بحلم قبل ما أنام

ازاى يعنى 

ايوة بحلم كل يوم قبل ما انام مبقتش خلاص اعرف احلم وانا نايم مابقاش فيه وقت اصلا للنوم علشان يبقى فيه احلام  .

بس الحلم اللى قبل النوم ده ليه حلاوة تانية خالص علشان بحلم باللى على مزاجى ايوة بحلم باللى انا عايز اكونه يعنى ممكن احلم انى غنى جدا ومعايا فلوس بالملايين وفى كل يوم بقى احلم انى عندى قصر فى المكان الفلانى او انى اخترعت اختراع عالمى مش ممكن حد يعرف اسراره غيرى وممكن حلم انى بخدم بلدى بثروة كبيرة او مشروع عالمى حتى .

صدقنى حلمك اللى قبل النوم ده والله بيديك دافعة قوية جدا للحياه جربة هيفرق معاك كتير 

وللحديث بقية طالما فى الحياة بقية

أراكم قريباً

أنا مش عارف أصحى بدرى

مشكلتى من صغرى عدم القدرة على الأستيقاظ بدرى ودى مشكلة ضيعت منى الكتير من الفرص وواحدة من الفرص دى :
وانا لسه فى تانية إعدادى وده كان فى سنة 1992 ( أيام الزلزال الشهير )
بس الكلام ده كان قبله بكام شهر وهو انه ضاع عليا بطولة الجمهورية ( لألعاب القوى ) بسبب انى مصحتش بدرى فى اول يوم للبطولة وكانت فى المعادى فى المركز الأوليمبى وده كان بعيد عنى قوى ومافيش فلوس طبعاً علشان اركب تاكسى ووقت ماوصلت كان الوقت فات وكنت اقرب واحد انى اخد المركز الأول علشان كان كل المنافسين كانوا معايا فى بطولة القاهرة وكنت الأول على القاهرة وطبعا مسابقة القاهرة كانت فى نادى السكة الحديد اللى هو النادى بتاعى وعلشان سكان قريب منه كنت يومها وصلت فى ميعادى واليوم ده كان سبب فى تركى للنادى وتغيير فكرة العاب القوى اصلاً من حياتى .
وده غير فرص كتيرة نبقى نتكلم عنها بعدين .
أسعد الله يومك ونكمل قريب السلام عيلكم